Nueche de branu

Fai hores qu’escureció. Hai un silenciu namás rotu polos tímidos coches que pasen sele. Pero nun llueve, l’asfaltu nun tien llárimes esta nueche. Siento dicilo asina tan fácil, pero nun sé que voi facer pa callar estes ganes d´abrazáte, nun sé, nun sé qué voi facer contigo.

El branu yera esto tamién, güei la nueche tien daqué d´esa esperanza que tienen los neños cuando,  asomaos pela ventana de madrugada, creen tenelo too per delantre.  Yo siéntolo asina, nun sé cómo dicite que ye too un pocu meyor dende que sé que puedes apaecer en cualquier momentu.

Pero fai hores qu’escureció, y yo siéntote, siéntote como una canción folk d'eses que tanto nos presten, suave, como la yerba recién cortao, como un pequeñu llar, como estrelles na nueche, como la to costenlación de peques qu'enxamás van fuxir porque son nel fondu pintures de guerra.

Porque yes irreductible y resistes, porque yes utopía fecha belleza. Porque yes indíxena y yes mundo. Porque yes llar y yes monte. Porque sientes lo que yo siento. Porque fales la llingua que fala la xente que yo quiero. Namás espero, que nunca te calles y faigas eterna esta nueche de branu una y otra vez.